Amerikada yaratilgan Phonix avtomobili (aynan shu model joriy yilda Ginness rekordlar kitobiga kiritildi) hozirda jahondagi eng mitti avtomobil hisoblanadi . Ammo siz uni bolajonlarning o‘yinchoq avtomobili deb o‘ylamang. Zero, bu to‘laqonli yengil avtomobil bo‘lib, unga hatto davlat raqami ham o‘rnatilgan.
Hammaga tushunarliki, bunday mashina davlat raqamiga egaligiga qaramasdan, unda yurishni bexatar deb bo‘lmaydi. Shu bois unga katta yo‘llarda yurishga ruxsat etilmaydi. Mitti avto mahalliy ahamiyatdagi ko‘chalarda, soatiga 25 mil, ya’ni tezlikni soatiga 40 kilometrdan oshirmasdan yura olishi mumkin. Mitti avtomobil uchun shu tezlik ham kifoya qiladi.
Avtomobilning o‘lchamlariga kelsak, uning balandligi 63,5 santimetrni, eni 65,3 santimetrni va uzunligi 1 metru 26 santimetrni tashkil etadi. O‘lchamidan ham ko‘rinib turibdiki, bunday mashinada yurish u qadar qulay emas, albatta. Shunga qaramasdan, mo‘’jaz avtomobil ijodkori Ostin Koulson, kashfiyotining o‘ziga yarasha afzalliklari borligini ta’kidlamoqda. Deylik, mittivoyni qo‘yish uchun alohida joy qidirib ovora bo‘lmaysiz. Uni ko‘cha darvozasi oldiga yoki yo‘lakka bemalol qo‘yib ketaverish mumkin.
Manba: hurriyat.uz, metro.co.uk