12 yoshli qizaloq va uning 13 yoshli “yigiti” Buyuk Britaniyadagi eng yosh ota-onaga aylanishdi. Bu haqda Daily Telegraph’ga asoslanib, “RIA Novosti” xabar berdi.
Ismi oshkor etilmayotgan boshlang‘ich maktab o‘quvchisi o‘tgan yilning yozida 11 yoshida homilador bo‘lib qolgan. Uning qizchasi yakshanba kuni Londonda dunyoga keldi. Chaqaloqning vazni 3,2 kilogrammni tashkil etdi.
Yosh ona o‘z farzandining otasi bilan bir yildan buyon uchrashib turadi. Qarindoshlarining so‘zlariga ko‘ra, ular bir-birini qattiq yaxshi ko‘radi va turmush qurish niyatida, biroq yosh masalasi ularning yo‘lida to‘g‘anoq bo‘lib turibdi. Qonun bo‘yicha, Angliyada 16 yoshga yetganlar ota-onalarining ruxsati bilan, 18 ga to‘lganlar esa mustaqil turmush qurishlari mumkin.
Tarixga kirgan o‘quvchi qiz o‘zidan avvalgi “rekordchi qiz”dan besh oylik kichkina. U mamlakatdagi eng yosh buvilardan biriga aylangan 27 yoshli onasi bilan yashaydi. Yaqinlarining aytishicha, chaqaloqning bobo-buvilari uning dunyoga kelganidan juda xursand va yosh ota-onani qo‘llashga tayyor.
