Farg'ona vodiysi va Toshkent shahrini bog'lovchi taksi yo'nalishlari joriy qilindi.O'zbekiston Avtomobil va daryo transporti agentligida Farg'ona vodiysi shaharlari va Toshkent shahrini bog'lovchi yangi taksi yo'nalishlarining ochilishiga bag'ishlangan matbuot anjumani bo'lib o'tdi. Mazkur tadbirda mavzu yuzasidan taqdimot o'tkazilib, yangi yo'nalishlarni ochish borasida amalga oshirilgan tayyorgarlik ishlari, Toshkent, Andijon, Namangan, Farg'ona va Qo'qon shaharlaridagi yo'nalishlarning oxirgi bekatlari barpo etilgan avtostansiyalarda yo'lovchilar uchun yaratilgan shart-sharoitlar haqida batafsil to'xtalib o'tildi.
Xususan, Farg'ona vodiysi aholisiga avtotransport xizmatlari ko'rsatish sifatini yaxshilash va tashuvlar xavfsizligini ta'minlash, jumladan, poytaxtga yengil avtomobillarda qonunga bo'ysungan holda yo'lovchi tashishni tashkil etish maqsadida, hukumat topshirig'i hamda mutasaddi idoralar taklifiga ko'ra "Toshkent — Andijon", "Toshkent — Namangan", "Toshkent — Farg'ona" va "Toshkent — Qo'qon" taksi yo'nalishlarini ochish borasida amalga oshirilayotgan tayyorgarlik ishlari ayni kunlarda nihoyasiga yetib qolgan bo'lib, mazkur yo'nalishlarning shu yil avgust oyi boshida ishga tushirilishi rejalashtirilmoqda.
Ma'lumki, avtotransport vositalarida tijorat asosida yo'lovchilarni tashish faoliyati tegishli litsenziyaga ega bo'lgan yuridik korxonalar tomonidan amalga oshiriladi. Shaxsiy avtotransport vositalari egalari esa huddi shunday litsenziyaga ega bo'lgan yuridik korxonaga a'zo bo'lgan holda faoliyat yuritishlari mumkin. Yuridik korxonalar o'z tarkibiga qo'shilgan barcha avtotransport vositalarini litsenziya varaqalari bilan ta'minlaydi va ma'lum bir yo'nalishlarda faoliyat yuritish huquqini qo'lga kiritish uchun esa ochiq tender tanlovlarida ishtirok etadi.
Ta'kidlash joizki, yo'nalishli taksi yo'nalishida faoliyat ko'rsatadigan yengil avtomobillir umumiy texnikaviy talablar standarti asosida, avtomobilning rangidan qat'iy nazar, bir qator ajratuvchi belgilar hamda ma'lumotlar bilan ta'minlanishi shart. Manba:UzReport.uz