Germaniyada yo'qolganidan keyin 31 yil o'tib tirik ekanligi ma'lum bo'lgan ayol topildi, deb xabar bermoqda The Sun nashri.
Petra Pajtsitka ismli bu ayol 1984 yilda yo'qolib qolgan. U o'shanda 24 yoshida akasining tug'ilgan kunida paydo bo'lmagan va izsiz yo'qolgan.
Ayolning yo'qolishi nemis nashrlarining birinchi sahifalaridan o'rin olgan va butun mamlakat bo'yicha uni qidirish boshlangan.
Pajtsitkani qidirish ishlari samarasiz yakunlangandan keyin politsiya ayolning qotilligini amalga oshirganini tan olgan gumonlanuvchini topgan, biroq u biroz vaqtdan keyin o'z ko'rsatmasidan voz kechgan.
Ayolning jasadi topilmagan va 1989 yilda u rasman vafot etgan deb tan olingan.
Biroq 31 yil o'tib Pajtsitka Dyusseldorfda Shneyder xonim ismi bilan, biroq hech qanday rasmiy hujjatsiz topildi. Ayolning shaxsi u o'zining uyidagi o'g'rilik bo'yicha politsiyani chaqirtirgandan keyin fosh bo'ldi. Ayol o'zini soxta nomi bilan tanishtirgan, biroq keyinroq undan hujjatlarini taqdim qilish so'ralganda o'zining asl ismini aytgan.
Pajtsitka 30 yil davomida bir shahardan ikkinchi shaharga ko'chib yuravergan va biror marta o'zining hayotligidan yaqinlarini xabardor etmagan.
Politsiya vakili “ayolning akasi va onasi uning hayotligini eshitishgandan keyin karaxt holga tushib, ko'zlariga yosh olganlarini” aytdi.
Politsiya vakilining ta'kidlashicha, Pajtsitka “o'zining yo'qolib qolishi sabablarini tushuntirib bermagan va kelgusida ham o'z oilasi va jamiyat bilan munosabat o'rnatishni istamayotganini ochiqchasiga aytgan”.
Prokurorlar ayol bu qilmishi bilan jinoyat sodir etgan deb hisoblamayaptilar, biroq ayol o'lgan deb hisoblangani uchun nemis rasmiy idoralarini o'zining tirikligidan rasman xabardor etishi kerak.