Daily Mail saytida ziyraklik bo‘yicha test (A Test of Wits) natijalari aks etgan maqola e’lon qilindi. Ladbrokes brokerlik kompaniyasi buyurtmasiga ko‘ra ishlab chiqilgan mazkur testning o‘ziga xosligi shundaki, uning har bir ishtirokchisi o‘ziga qaysi mobil qurilma ishlab chiqaruvchisi (Apple, Samsung, Nokia, Motorola, Blackberry yoki boshqasi) mahsuloti ko‘proq yoqishini ham ko‘rsatishi lozim. Bu haqda siliconrus.com sayti xabar bergan.
Test atigi yettita savoldan tarkib topgan, ammo ulardan har biriga to‘g‘ri javob bergandan keyingina navbatdagi savolga o‘tish mumkin edi. Aniqlanishicha, o‘rta hisobda olganda, Apple mahsulotlarini yaxshi ko‘ruvchilar savollarga boshqa platformalar ishqibozlaridan ko‘ra tezroq javob berishgan.
Mana, o‘rtacha natijalar quyidagicha ko‘rinishda bo‘lgan:
Apple: 94 soniya
Google: 99 soniya
Samsung: 103 soniya
HTC: 105 soniya
Nokia: 109 soniya
BlackBerry: 118 soniya
Mingdan ortiq kishi ishtirok etgan so‘rovda Blackberry tarafdorlari eng past ko‘rsatkichni namoyon etib turishibdi.
Testdagi savollar taxminan quyidagicha bo‘lgan:
1 dan 100 gacha bo‘lgan sonlar qatorida nechta 9 raqami bor? a) 19 b) 20 c) 9 d) 1 e) 14
Nechta oy tarkibida 28-sana bor? a) 1 b) 12 c) 24 d) 10
Ikkita it va ikkita o‘rdakning oyoqlari jami nechta bo‘ladi? a) 8 b) 10 c) 12 d) 14
Xo‘sh, o‘zingizda ziyraklik darajasi qanday ekan?
Manba: Daryo.uz
Foto manba: shanghaisquared.com