Kaliforniya shtatining Santa-Barbara shahrida xitoy tabobatiga asoslangan klinikaga ega shifokor, 57 yoshli Veydong Xanning otib ketilgan holdagi jasadi topilgan. Bu haqda Associated Press axborot agentligi ma'lum qildi, deb yozadi "KUN.UZ".
Ma'lum qilinishicha, shifokorning jasadi o'z uyining garajida 29 yoshli rafiqasi va 5 yoshli qizining jasadlari bilan birga, polietilen paketga solinib, skotchlab tashlangan holda topilgan.
Xitoylik shifokorning o'ldirilishi Santa-Barbara aholisini larzaga soldi. Shifokor bu yerda taniqli shaxs bo'lgan.
Mahalliy sherif Bob Braun Xanni o'ldirishda gumon qilinib, voqea joyidan 170 mil uzoqlikda, San-Diegodagi avtomobillarga yoqilg'i quyish shoxobchasida 27 yoshli erkak qo'lga olinganini ma'lum qildi. Uning avtomobili ichida Xanga tegishli buyumlar va o'qotar qurol topilgan.
Mahalliy rasmiylarning taxminicha, qotillik Xanning tadbirkorlik faoliyati bilan bog'liq bo'lishi mumkin.
