O'zbekiston musulmonlar idorasi “Yangi yil, ya'ni, 1 yanvarni kutib olish, bu kunda bir-birini tabriklash musulmonchilikka to'g'ri kelmaydi” degan gaplarga izoh berdi. Bu haqda 26 dekabr, juma kuni uchun chiqarilgan “Yil hisobi – umr sahifasi” nomli juma ma'ruzasida ma'lumot berilgan.
“Xalqimiz ichida “Yangi yilni, ya'ni 1 yanvar kunini kutib olish, bayram qilish, bir-birini tabrik qilish musulmonchilikka to'g'ri kelmaydi, u xristianlarning bayrami kabi gaplarni gapirib yuruvchilar ham bor. Biz shu kabi kimsalarga yana bir bor eslatib qo'ymoqchimizki, 1 yanvar – xristianlarning bayrami emas, balki shamsiy-milodiy sana bilan yil hisobini yurituvchi xalqlarning hammasi uchun yil boshi sifatida qarshi olinadigan kun”, – deyiladi maruzada.
Idoraning tushuntirishicha, “biz yangi yilni musulmoncha e'tiqod bilan kutib olamiz”. “Ba'zilardek noshar'iy holatlarda kutib olmaymiz. Hatto dinimiz ta'limoti bo'yicha har bir kunni qarshi olishda “Mana shu yorug' kunga salomat yetkazganingga shukr” – deb Alloh taologa hamdu sanolar aytishimiz lozim”, – deyiladi maqolada.
O'MIning qayd etishicha, “Bayonun linnos” nomli kitobda bu xususda musulmonlar uchun ancha kenglik borligi qayd etilgan. Dalil sifatida “Rum” surasining 1-5 oyatlari va hadisi shariflardan keltirilib, ikki hayitdan boshqa muhim voqea yuz bergan sanalarni bayram qilish va bayramlar diniy hamda dunyoviy sabablar munosabati bilan nishonlash durustligi zikr etilgan.
“Binobarin, yangi milodiy-shamsiy yilni diniy bayram sifatida emas, yilning yangilanishi, umrimizga umr qo'shilishi, eski yilda qilib ulgurmagan xayrli ishlarimizni yangi yilda qilish uchun yaxshi niyatlar bilan kutib olishimiz ham aqlan, ham shar'an joiz ekan”, – deyiladi maruzada.
