Hammamiz ham tushimizda tanimagan odamlarni ko’rib turamiz. Bu tabiiy hol. Lekin,siz ko‘rgan noma’lum shaxsni bir-birlariga notanish va uzoqlarda yashaydigan bir necha odam ko‘rsa, buni qanday izohlagan bo‘lardingiz?
Ismi, yoshi yoki kimligi noma’lum bo‘lgan bu shaxsni ilk bor "ko‘rgan” ayol 2006 yil yanvarda Nyu-Yorkning mashhur ruxshunoslaridan birining eshigini qoqdi. Noma’lum shaxsning tasvirini chizib, uning bir necha bor tushiga kirganini va bu shaxsni umuman tanimasligini aytgan. Bu shaxs har safar tushiga kirganida ayolga hayotida nimalar qilishi kerakligi haqida tavsiyalar bergan. Albatta, buning hech qanday hayratlanarli tomoni yo‘q. Lekin dunyoning turli shaharlarida yashovchi 2000 odam tushlarida xuddi shu rasmdagi yuzni ko‘rganini aytganidan keyin haligi surat atrofida katta shov-shuv ko‘tariladi. Katta ko‘chalardagi bekatlarga "Siz ham ko‘rganmisiz?” degan afishalar ilina boshlaydi."Qayerda ko‘rgansiz: tushda yo o‘ngda? Agar ko‘rgan bo‘lsangiz shaxsan menga yoki thisman.org saytiga bog‘laning. Dunyoda minglab odamlarning og‘irini yengil qilasiz. Chunki bu insonlar hech kim tanimagan, ko‘rmagan noma’lum shaxsning har kecha tushlariga kirishining sababini bilolmay hayronlar. Qo‘limizda faqat qo‘lda chizilgan tasviri bo‘lgan shaxsning boshqalardan farqi nimada?” Ushbu savolga javob topgan kishi Nobel mukofotini olgandek hurmatga sazovor bo‘ladi.
Xuddi shu odam boshqa tushlarda
Kunlar o‘tib, ruxshunosga kelgan boshqa kishi ham tasvirdagi haligi shaxsga ko‘zi tushadi-yu uni bir necha bor tushida ko‘rganini aytadi. Ruxshunos bu tasvirni hamkasblarining e’tiboriga havola qiladi. Ruxshunoslar kabinetlariga bu tasvirni osib qo‘yishadi. Buni qarangki, bir necha kunda har biriga kelgan bemorlardan yana bir nechasi xuddi shu shaxsni tushlarida ko‘rganligini aytib doktorlarni lol qoldiradi. 2006 yil yanvardan buyon kamida 2000 kishi bu shaxsni ko‘rganligini iddao qilgan. Buning ustiga faqat Nyu-Yorkda emas. Los-Anjeles, Berlin, San-Paulu, Tehron, Pekin, Rim, Barselona, Stokgolm, Parij, Nyu-Deli, Moskvada ham… Lekin hammasining savoli birday: Bu sochlari yarmi to‘kilgan, qoshlari tutashib ketgan, labining ustki qismi ingichka, quloqlari katta-katta, korachadan kelgan odam kim? Nima uchun hammaning tushiga kiryapti? Mutahassislar ushbu savolga javob topish uchun noma’lum shaxsning tahminiy suratlarini tushda ko‘rilgan shaharlarning markazidagi binolarga, daraxtlarga va restoran eshiklariga yopishtirib chiqishdi. Lekin hali-hanuz hech kim chiqib "Bu menman” demadi. Hech kim uni ko‘chada yoki boshqa joylarda uchratmagan. Faqat rasman 2000 kishi "thisman.org” nomli internet sayti orqali tushlarida ayni odamni ko‘rganliklari haqida so‘z yuritishgan. Maqsadlari bu odamning nima uchun dunyoning turli shaharlaridagi turli xarakter va o‘tmishga ega kishilarning tushlariga kirib, har xil xabarlar berishini tushunish. Endi siz ham bu shaxsni tushingizda ko‘rsangiz nima qilish kerakligini bilasiz.
Qo‘rqqanlar ham bor, oshiq bo‘lganlar ham
Quyida "thisman.org” saytidan joy olgan tushlardan bir nechtasi keltirilgan:"Uni ilk ko‘rganimda oshiq bo‘ldim. Romantik so‘zlari bilan aqlimni oldi…”
"Tushimda uni doim Qor bobo sifatida ko‘rardim. Har gal juda xursand bo‘lardim. Menga qarab kulardi. So‘ngra boshi sharga aylanib, uchardi. Unga yetishishga harakat qilardim, lekin yeta olmasdim…”
"Bu odam braziliyalik bo‘lib, juda kelishgan edi. O‘ng qo‘lida oltita barmog‘i bo‘lgan maktab o‘qituvchisi edi. Menga "Amerikada yadro urushi boshlansa, shimolga qoch” derdi.”
"Uni ilk bor tushimda ko‘rganimda hayotimda juda murakkab paytlar edi. Katta supermarketda orqamdan quvib yurdi. So‘ngra meni tutib olib, kassaga boradigan yo‘lni ko‘rsatdi. Shundan beri bu odam qachon tushimga kirsa, menga yo‘l ko‘rsatadi.”
Nazariyalar ko‘paymoqda
Ko‘pchilikning fikricha, tasavvurimizda ba’zan yuzaga chiqadigan muayyan bir shakl-shamoyil bo‘ladi. Bu holat his-hayajonli hodisa, katta o‘zgarish, stresli hollar kabi hislar tarang bo‘lgan vaqtda yuz beradi.Ba’zilarning fikricha, haqiqiy hayotda bunday odam bor va insonlarning tushlariga kirib psixologik ta’sir ko‘rsatadi.Yana bir psixo-sotsiologik teoriyaga ko‘ra, bunday odamni tushida ko‘rganidan ta’sirlangan insonlar shunga o‘xshash tushlar ko‘rib, uni o‘zi istamagan holda fenomen holiga keltirgan.
manba: www.thisman.org
