Mobile World Congress ko‘rgazmasida Samsung kompaniyasi o‘zining flagman smartfoni – Galaxy S5 modelini namoyish qildi. Mazkur qurilma Koreya kompaniyasining ko‘pchilik orziqib kutgan yangiligidir , deb yozadi "Sukerberg pozvonit” sayti.
Yangi gadjetning eng ko‘zga ko‘rinarli yangiliklari barmoq izlari skaneri, puls datchigi va kamera bo‘ldi. Bundan tashqari, avvalgi avlodlaridan farqli ravishda, Galaxy S5 chang va suv o‘tkazmaydi. Ammo korpusi bir qarashda metallga o‘xshab ko‘rinsa-da, aslida plastikdan ishlangan.
Yangi flagmanning barmoq izlari skaneri, xuddi asosiy raqibi iPhone 5s’dagi kabi, "Uy” tugmachasida joylashgan. Farqi – Apple qurilmasida tugmachaga shunchaki barmoqni qo‘yib turish yetarli bo‘lsa, Galaxy S5’da barmoqni tugmacha ustidan yuritish talab etiladi.
Barmoq izi tekshiruvi orqali smartfon blokirovkadan chiqariladi va internet-do‘konlarda xaridlar amalga oshiriladi. Bulardan tashqari, barmoq izi smartfondagi "shaxsiy” hududga (Private Mode) kirish uchun "kalit” bo‘lib ham xizmat qiladi. Unda begona ko‘zdan yashirish lozim bo‘lgan fayllar va dasturlarni saqlash mumkin. Galaxy S5 uchtagacha barmoq izini o‘z xotirasida saqlay oladi.
Gadjetning puls datchigi uning orqa panelida, kamera obyektivi ostida joylashgan. U inson pulsini barmoq uchidan, o‘rtacha 5–10 soniya davomida sanab oladi.
Kutilganidek, Galaxy S5 asosiy kamerasi 16 megapikselli bo‘lib, 4K sifat darajasida videoga ola biladi. Unda gibrid avtofokus mavjud bo‘lib, juda tez – 0,3 soniyada zaruriy holatga o‘tadi.
Smartfon 5,1 dyuym diagonalli, 1920×1080 pikselli displeyga ega. Qurilmaning to‘rt yadroli Snapdragon 800 protsessori 2,5 gigagers chastotada ishlaydi. U Android 4.4.2 bazasida ishlaydi.
Galaxy S5 11-apreldan dunyoning 150 ta mamlakatida sotuvga chiqariladi. Unga qo‘shimcha tarzida kompaniya Gear Fit bilaguzugini ham chiqargan. Unda qadam o‘lchagich, yana bitta puls datchigi va sekundomer mavjud. Qurilma narxi hozircha ma’lum qilinmayapti.
24-fevral kuni MWC doirasida Samsung o‘zining ikkinchi avlod "aqlli soat”lari – Gear 2 va Gear 2 Neo modellarini namoyish etgan edi. Ular Tizen operatsion tizimida ishlaydi va batareyasi 2–3 kun davomida zaryadkasiz ishlay oladi. O‘tgan yili sentabrda chiqqan Galaxy Gear zaryadkasi esa bir kungagina yetar edi.
