2016-yilda tinchlik bo‘yicha Nobel mukofotiga rekord sondagi da’vogarlar ilgari surildi, deya xabar bermoqda Meduza Nobel qo‘mitasi saytiga tayanib.
Tashkilotga jami 376 ta ariza kelib tushgan. Mukofotga da’vogarlar orasida 228 nafar kishi va 148 ta tashkilot bor.
Nobel qo‘mitasi tinchlik bo‘yicha mukofotga aynan kimlar da’vogarlik qilayotganiga aniqlik kiritmadi.
Bundan avvalgi rekord 2014-yilda o‘rnatilgan edi. O‘shanda 278 nafar nomzoddan ariza kelib tushgan.
Nashr eslatishicha, avvalroq tinchlik bo‘yicha Nobel mukofotiga AQSh Milliy xavfsizlik agentligi sobiq tahlilchisi Edvard Snouden, Kolumbiya hukumati va FARC isyonchilari, shuningdek, Gretsiya aholisi da’vogarlik qilayotgani aytilgan edi.
