O‘zbekiston Markaziy saylov komissiyasida 16-mart, chorshanba kuni komissiya raisi Mirzo-Ulug‘bek Abdusalomov rahbarligida majlis bo‘lib o‘tdi. Bu haqda MSK matbuot xizmati xabar berdi.
Majlisda “O‘zbekiston Respublikasi Oliy Majlisiga saylov to‘g‘risida”gi qonunning 61-moddasi va “O‘zbekiston Respublikasi Markaziy saylov komissiyasi to‘g‘risida”gi qonunning 5-moddasiga muvofiq bo‘shab qolgan o‘ringa Senat a’zosi saylovini o‘tkazish bo‘yicha Toshkent viloyati davlat hokimiyati vakillik organlari deputatlarining qo‘shma majlisini o‘tkazish masalasi ko‘rib chiqildi.
Komissiyaning shu yil 4-fevralidagi yig‘ilishida Senati a’zosi Ahmadjon Usmonovning xalq deputatlari Toshkent viloyati Kengashi deputati vakolati tugatilganligi munosabati bilan uning senatorlik vakolatini muddatidan ilgari tugatish to‘g‘risida masala ko‘rib chiqilib, tegishli qaror qabul qilingan edi. Bo‘shab qolgan o‘rinni to‘ldirish maqsadida Senat a’zosi saylovini o‘tkazish bo‘yicha qo‘shma majlisni 2016-yil 26-mart kuni soat 10:00 da Chirchiq shahridagi “Kimyogarlar” madaniyat saroyi binosida o‘tkazish to‘g‘risida qaror qabul qilindi.
Eslatib o‘tamiz, 4-fevral, payshanba kuni O‘zbekiston Prezidenti Islom Karimov Toshkent viloyati hokimi Ahmadjon Usmonovni lavozimidan ozod etish to‘g‘risidagi farmonni imzoladi. Shu kuni Sodiq Abdullayev Toshkent viloyatining yangi hokimi etib tayinlandi. U bungacha viloyatning Zangiota tumaniga hokimlik qilib kelayotgan edi.
Manba
