AQSh Savdo vazirligi Standartlar va texnologiyalar milliy instituti (NIST) 2014-yilning 3-aprelida NIST-F2 deb nomlangan yangi atom soatini ishga tushirdi. Uning aniqligi shu darajadaki, 300 million yilda bir soniyagagina adashishi mumkin. Bu haqda institutning rasmiy sayti ma’lumot bermoqda.
NIST xabariga ko‘ra, yangi soat avvalgi NIST-F1 o‘rniga qo‘yilib, AQShda fuqarolik vaqti andozasi (standarti) sifatida qo‘llaniladi. Avvalroq NIST-F2 haqidagi ma’lumotlar Parijdagi Xalqaro o‘lchovlar va mezonlar byurosiga yuborilgan va bu tashkilot uni dunyodagi eng aniq ishlaydigan atom soati, deya e’tirof etgan edi.
Atom soatining avvalgi versiyasi – NIST-F1 AQShda 1999-yildan buyon fuqarolik vaqti andozasi sifatida qo‘llanib kelinayotgan edi. Amerika harbiy vaqti andozasi esa boshqa tashkilot – AQSh Harbiy-dengiz observatoriyasi tomonidan belgilanadi.
