Bugun futzal bo'yicha Osiyo chempionatining yarim finalidan o'rin olgan O'zbekiston - Tailand uchrashuvi bo'lib o'tadi, deb yozadi "Championat.asia".
G'olib jamoa qita chempionatining finaliga yo'l oladi. Bugunga qadar O'zbekiston terma jamoasi Osiyo chempionatida uch bor final o'yinida maydonga tushgan. 2001 yil Eronda o'tkazilgan musobaqada jamoamiz finalda mezbonlarga 0:9 hisobida yutqazib qo'yishgan. 2006 yil Toshkentda o'tgan musobaqada ham vakillarimiz hal qiluvchi bahsda ishtirok etishgan. Bu safar Yaponiya 5:1 Hisobida g'alaba qozongan. 2010 yil yana Toshkent mezbonlik qilgan chempionat finalida O'zbekiston Eronga qarshi o'ynab 3:8 hisobida yutqazib qo'ygandi.
Tailand terma jamoasi esa 2008 o'z uyida o'tgan qita birinchiligi finalida Eronga 0:4, 2012 yil BAAdagi Osiyo chempionati finalida Yaponiyaga 1:6 hisobida imkoniyatni boy berib qo'ygan.
Demak, agar bugun O'zbekiston g'alaba qozonsa to'rtinchi bor, Tailand zafar quchsa uchinchi bor finalga chiqadi.
