Agar sayohat yoki xizmat safarlariga ko’p chiqadigan bo’lsangiz, tabiiyki, mehmonxonalarga ko’p bor tashrif buyurasiz. Ular bir-biridan ko’rinishi, xizmat sifati va turlari, qulayliklari bilan farq qiladi. Lekin shunday mehmonxonalar borki, dunyoda ularga o’xshash boshqa mehmonxona topilmaydi. Ular o’zgacha ko’rinish va g’ayrioddiy me’moriy uslubga ega.Quyida shunday g’aroyib mexmonxonalardan bir nechtasi haqida hikoya qilmoqchimiz.
Attrap’Rêves kapsula-mehmonxonasi – Fransiya
Ochiq tabiat qo’ynida dam olishni istasangiz – Attrap’Rêves mehmonxonasi siz uchun! Mehmonxona nomerlari katta shisha qoplama bilan o’ralgan. Mehmonxona 2010-yilda qurilgan.
Marmara mehmonxonasi – Antalya, Turkiya
208 ta nomerdan iborat bu 5 yulduzli mehmonxona dunyoda yagona aylanuvchi mehmonxona hisoblanadi. Qanday qilib deysizmi? Mehmonxona doim aylanib turadigan 24 xonali chordoqqa ega. Mehmonxonadan turib O’rtayer dengizi va Antalya shahri manzarasini tomosha qilish mumkin.
nHow mehmonxonasi – Berlin, Germaniya
G’aroyib uslubda qurilgan ushbu mehmonxonada zamonaviy va o’zgacha muhit yaratilgan. 304 nomerdan iborat, lyuks xonalar ham bor. Mehmonlar xona rangini o’zlari tanlashlari mumkin.
Kokopelli G’or mehmonxonasi – Nyu-Meksiko, AQSH
$IMAGE4$
Nyu-Meksiko shtatidagi Farmington shahrida joylashgan bu mehmonxona 1980-yilda qurilgan. Uning g’aroyibligi shundaki, mehmonxona nomerlari g’orlardan iborat. 65 million yillik qoyalarda joylashgan bu mehmonxona tabiat va inson uyg’unligining ajoyib namunasidir.
Ice Hotel(Muz mehmonxonasi) – Shvetsiya
Yukkas’yarvi shahrida qad rostlagan bu mehmonxona muz va qordan qurilgan dunyoda eng yirik mehmonxona hisoblanadi. Mehmonxonada harorat, tahminan, -5 daraja. Yoz kelib, qor va muzlar erib ketadi, lekin har yili noyabr oyida mehmonxona qaytadan quriladi.
Palacio de Sal – Boliviya
Salar-de-Uyuni shahrida joylashgan bu mehmonxona tuzdan qurilgan. 15 ta nomer, oshxona, dam olish zali va bardan iborat. Mehmonxonadagi deyarli hamma narsa: devorlar, mebellar, pol, shift – sement bilan qotirilgan tuz bloklaridan qurilgan. Mehmonlardan so’raladigan yagona iltimos – devor va mebellarning ta’mini tatib ko’rmaslikdir!
Jules Suvosti mehmonxonasi – Florida, AQSH
Ki-Largo shahrida joylashgan Jules Underwater Lodge avvaliga ilmiy-izlanish laboratoriyasi edi. Keyin esa dunyoda eng birinchi suvosti mehmonxonasiga aylantirildi. Mehmonxona 6.5 metr suv ostida joylashgan bo’lib, mehmonlar dengiz tubi manzarasidan bahramand bo’lishlari mumkin. Yashash uchun barcha sharoitlar muhayyo.
Kakslauttenan mehmonxonasi – Finlayandiya
G’aroyib tabiat hodisasi – Shimol yog’dusi tomosha qilishni istasangiz, Kakskauttenan mehmonxonasiga keling. Mehmonxonaning muz va shishadan qurilgan nomerlari o’zgacha issiq va qulay.
Jumbo mehmonxonasi – Shvetsiya
Stokgolmning Arlanda aeroporti hududida Boing747 samolyotida Jumbo mehmonxonasi joylashgan.U 25 ta nomerdan iborat bo’lib, bir paytda 85 kishiga xizmat ko’rsata oladi. Barcha nomerlar yuvinish xonasi, televizor va boshqa qulayliklar bilan jihozlangan. Hatto, internetga ulanish imkoniyati ham mavjud. Mehmonxonada 1 kun turish 150-700 dollarni tashkil etadi.