Yurtimizda oltin kuz – to’kin-sochinlik fasli hukm surmoqda. Quyoshning zarrin nurlari ostida pishib yetilgan hilma-xil mevalarni ko’rib ko’zingiz quvnaydi. Bu shirin-shakar mevalarni yemabsiz – bu dunyoga kelmabsiz. Biroq dunyoda shunday g’ayrioddiy mevalar borki, ularni bir ko’rishda meva demaysan kishi. Tatib ko’rishni-ku gapirmasa ham bo’laveradi. Bugun sizga ana shunday ekzotik mevalardan ba’zilari haqida hikoya qilmoqchimiz.
Rambutan
Bu “o’zga sayyoralik” meva dunyoning deyarli barcha tropik mamlakatlarida topiladi. Malayziya tilida “sochli” degan ma’noni anglatuvchi ushbu totli meva qizil va tuklari ko’p bo’lganda pishgan hisoblanadi. O’rtasidan ikkiga ajratib, ichidagi oppoq eti yeyiladi. Urug’i va po’stini yeb bo’lmaydi.
Durian
Mevalar qiroli hisoblanadigan durian dunyodagi eng badbo’y mevadir. Og’irligi 3 kilogrammgacha yetadi, po’sti toshday qattiq. Hidiga chiday olsangiz, juda mazali va foydali mevadan bahramand bo’lasiz.
Goya – taxir qovun
Qovunni yoki bodringni eslatuvchi ushbu meva pishmasidan oldin yig’ishtirib olinadi. Homligicha yoki pishirib yeyish mumkin. Mayonez bilan salatlarga ajoyib ta’m beradi.
Akebi
Binafsharang ushbu meva nordon bo’lgani uchun ko’proq sabzavot sifatida iste’mol qilinadi. Tuzlash ham mumkin. Urug’i ajratish qiyin bo’lgani uchun eti bilan birga yeyiladi. Yaponiya shimolida o’stiriladi, biroq Yaponiyaning o’zida ham kamyob. Shuning uchun bu mevani yeb ko’rgan bo’lishingiz ehtimoldan yiroq.
Budda qo’li
Sariq rangli bu g’alati sitrus meva Osiyo mamlakatlarida ko’p uchraydi. Xushbo’y hidga ega. Po’sti qandolatchilikda ishlatiladi. Eti esa ajoyib salatlar tayyorlashga yaraydi.
Mangostin
Tennis koptogidan salgina kichikroq ushbu tropik meva qalin siyohrang po’st bilan qoplangan. Oppoq etidan murabbo tayyorlash mumkin. Aytishlaricha qirolicha Viktoriyaning sevimli mevasi bo’lgan ekan.
Salak – ilon meva
Jigarrang tangasimon po’st bilan qoplangani uchun shunday atashadi. Eti biroz nordon. Malayziya o’rmonlaridagi maymunlarning sevimli ozuqasi. Ba’zi turlari juda qimmat bo’lib, tarkibida 13.5%gacha alkogol saqlaydi.
Kaktus mevasi
Nopal kaktusi deb ataladigan o’simlikning ushbu siyohrang mevalari ham tanasi kabi tikan bilan qoplangan. Juda shirin. Vitamin Cga bo’lgan kundalik ehtiyojning 13%ini qoplaydi. Meksika oshpazlari tuxum yoki go’sht bilan ajoyib taomlar tayyorlashadi.
Pitaya
Ta’mi kivi va shaftolini eslatadigan pushti meva unchalik shirin bo’lmasa ham, antioksidantlarga boy. Ko’ndalangiga kesib ichidagi oq eti urug’i bilan birga yeyiladi
