Sankt-Peterburgdagi Ermitaj Davlat muzeyida "Madaniyat dialogi” an’anaviy media-forumi doirasida konferensiya bo‘lib o‘tdi. Unda o‘zbekistonlik yosh iqtidorli ijodkorlar o‘zilarning ishlarini namoyish etdi, deb xabar berdi "Podrobno” nashri.
30 mamlakatdan 300 dan ortiq OAV vakillari qatnashgan konferensiyada XXI asrning dolzarb madaniy tendensiyalari muhokama qilindi, ijodiy g‘oyalar almashildi va ishtirokchilar o‘z ishlarini namoyish etdi. Ularning orasida O‘zbekistonning iqtidorli yoshlari ham bor edi.
"Madaniyat dialogi” ishtirokchilari uchun hujjatli film ijodkorlari va kino arboblari ishtirokida mahorat darslari tashkil etildi. Mahorat darslari doirasida "Mening bir kunim” umumiy mavzusi yo‘nalishida qisqa metrajli filmlar namoyishi ham o‘tkazildi.
Fotografiya san’ati va grafik videomontaj dasturi yordamida tayyorlangan "Alisa mo‘jizalar mamlakatida” videoroligi ishtirokchilarda katta qiziqish uyg‘otdi. Ushbu rolikning muallifi O‘zbekiston Milliy universitetining bitiruvchisi, professional fotosuratchi Milena Narinyandir. Uning so‘zlariga ko‘ra, unga ona shahri Toshkent ilhom bag‘ishlagan. Uning qisqa filmini suratga olish ishlari aynan shu yerda amalga oshirilgan.
Shuningdek, xalqaro tomoshabinlar o‘zbekistonlik yosh ijodkorlarning yana bir "Zarba ketidan zarba” deb nomlangan qisqa metrajli filmini iliq kutib oldi. Bu havaskorlik ishida toshkentlik yosh bokschi Anvar Nurmuhammedovning hayoti hikoya qilinadi.