O‘zbekistonda shunday odat bor: mehmonga choy uzatishdan avval mezbon piyolaga choy quyib, choynakka qaytarib soladi, bu uch marta takrorlanadi. Gap shundaki, shu tariqa choy tezroq dam yeydi, piyolalarga solingan choy ham bir xil tusda bo‘ladi, deb yoziladi Facebook’dagi Uzbek Cuisine sahifasida.
Bundan tashqari, o‘zbek oilalarida mehmonga choyni piyolaga yarim qilib solib berish an’anasi ham mavjud. Natijada mehmonning choyi tez tugab qolib, u uy egasiga qayta-qayta choy so‘rab murojaat qiladi. Ushbu odatning ma’nosi shundan iboratki, mezbon choyni piyolaga kamroq quyib berishi mehmondo‘stlik alomatidir, mehmonning choy so‘rashi esa uy egalariga hurmat belgisi hisoblanadi. Bundan tashqari, to‘la bo‘lmagan piyolani qo‘lda ushlash ham qulay.
Eski odatlar bo‘yicha, o‘zbek oilasi uyiga tashrif buyurgan yoqimsiz mehmonga choyni piyolaga to‘ldirib uzatishgan va diplomatik tarzda uning xushlanmaganini bildirishgan. Mehmon esa mezbon nimaga shama qilayotganini tushunib, choy ichasolib ketishga shoshilgan. Biroq hozirgi kunda bunday an’anaga rioya qilinmaydi.
