Surxondaryo viloyati Sherobod tumani “Yosh tabiatshunoslar markazi” direktori Bo‘ri Rahimov uyida parvarishlayotgan “Gosha” laqabli qarg‘a o’zbek tilida gapira oladi.
Qanotidan shikastlangan qarg‘a qishning ayozli kunlaridan birida uning hovlisida paydo bo‘ldi. Bo‘ri aka uni uzoq vaqt davoladi. Dastlab don va suv, keyinchalik yong‘oq, pista, go‘sht bilan boqdi.
Qarg‘a sekin-asta o‘ziga kelib, batamom tuzaldi. Endi u boshqa qarg‘alardan farqli o‘laroq, odobli, itoatkor qarg‘aga aylandi. Kunlarning birida u egasiga qarab «Gosha» deb ovoz berdi. Boshida Bo‘ri aka uni shunday nom bilan chaqirardi. Shu-shu, uning nomi «Gosha» bo‘lib qoldi. Tilga kirgan qarg‘aning «so‘z lug‘ati»da «Yaxshi qoling», «Yaxshi boring», «Yaxshi o‘qing» degan samimiy iboralar bor.
Bo‘ri Rahimovning uyi tuman markazidagi dehqon bozorining shundoqqina biqinida joylashgan. Shu atrofdagi maktab binosi bilan uning hovlisi o‘rtasidagi masofa ham bir qadam. Bolalar maktabga qatnashda aylanma yo‘llar orqali emas, uning hovlisi ichidan kesib o‘tishni ma’qul ko‘rishadi. «Gosha» har kuni ertalab bolalarning yo‘liga peshvoz chiqadi-da, «Yaxshi boring», «Yaxshi o‘qing» deb ularga tilak bildiradi. Gohida bolalarning xandon otib kulganidan sukut saqlab tursa, gohida ulardan «Rahmat» so‘zini eshitgach, «Rahmat» deb javob qaytaradi.
