Barselonada, “Kamp Nou” stadionida afsonaviy futbolchi Yoxan Kroyffning memoriali ochildi. Bu haqda “Korrespondent.net” xabar bermoqda.
Yodgorlik obidasini “Barselona” jamoasining amaldagi prezidenti Xosep Mariya Bartomeu ochib berdi. Shuningdek, marosimda klubning sobiq o‘yinchilari, murabbiylari va xodimlari, “Real” prezidenti Florentino Peres, muxlislar va siyosatchilar ishtirok etdi. Memorial ochilishining ilk soatlaridanoq uning poyiga futbolchining xotirasini yod etish maqsadida minglab muxlislar yetib keldi.
Yoxan Kroyff “Barselona” tarkibida 1973–1978-yillarda to‘p surgan, 1988–1996-yillarda esa u jamoaga murabbiylik qilgan.
Ilgariroq “Barselona” muxlislari klub stadioni “Kamp Nou”ni Yoxan Kroyff sharafiga nomlashni taklif etib, Twitter’da maxsus #EstadiJohanCruyff heshtegini yaratgani xabar qilingan edi.
O‘pka saratoniga qarshi bir necha yildan buyon kurash olib borgan Yoxan Kroyff 24-mart, payshanba kuni 68 yoshida vafot etdi.
Manba
