O‘tgan yilda Yevropa mamlakatlaridan olib qochib, yashirin tarzda Tojikistonga jo‘natilgan jami yigirmata qimmatbaho avtomobil O‘zbekiston Respublikasi bojxonachilari tomonidan to‘xtatib qolingan. Bu to‘g‘rida Davlat bojxona qo‘mitasi matbuot xizmatiga tayangan holda UzDaily xabar bermoqda.
Bojxonachilar shubhali ko‘ringan ayrim vagonlarni tegishli tartibda nazoratdan o‘tkazganida, Boltiqbo‘yi mamlakatlaridan kelayotgan yuklar orasida, bojxona hujjatlarida ko‘rsatilmagan holda, bir nechta yengil mashinalar olib kelinayotganligi aniqlangan. Hujjatlarga ko‘ra esa konteynerlarda faqat avtomobil ehtiyot qismlari bo‘lishi kerak edi.
Shu tariqa, O‘zbekiston Respublikasi DBQ xodimlari tomonidan 2013-yilda tranziti to‘xtatib qolingan kontrabanda yuklar orasidagi avtomobillarning umumiy qiymati 3,33 milliard so‘m (salkam 1,5 million AQSh dollari) ni tashkil etadi. Ular asosan BMW X6, BMW X5, BMW 525D, Honda CR-V, Honda Civic Hybrid, Lexus RX-450H, Honda, Range Rover Westminster, Range Rover Sport, OPEL ASTRA FCC-1.6 va boshqa modeldagi qimmatbaho avtomobillar bo‘lgan.
Gazeta.uz xabariga ko‘ra, yuklarning hujjatlarini tekshirish natijasida, ularning yuboruvchisi yopiq turdagi Eurofire aktsionerlik jamiyati (Latviya), qabul qiluvchisi esa – Tojikiston fuqarosi ekanligi aniqlangan. Interpol orqali tekshirilganda, yuqorida ko‘rsatilgan transport vositalari Yevroittifoq hududi bo‘ylab qidiruvda ekanligi ma’lum bo‘lgan. Yevropa Ittifoqi mamlakatlaridan olib qochilgan bu mashinalar Latviya va Litvaga olib borilib, davlat raqamlari almashtirilgan, qalbaki hujjatlar tayyorlangan, keyin esa temir yo‘l transporti orqali Tojikistonga jo‘natilgan.
Fosh etilgan huquqbuzarliklar yuzasidan O‘zbekiston Respublikasi qonunchiligiga binoan tegishli harakatlar olib borilmoqda.
