Bugungi kunda barcha maktablar qoshida xususiy korxonalar tomonidan oziq-ovqat mahsulotlari bilan ta'minlanadigan oshxonalar mavjudligiga qaramay, o'quvchilar tashqarida sotiladigan yengil taomlar bilan tamaddi qilishni ma'qul ko'rmoqda.
Bunday mahsulotlarning har doim ham sifat talablariga javob bera olmasligi esa e'tibordan chetda qolmoqda. Bu masalani oydinlashtirish uchun Anhor.uz sayti o'z surishtiruvini o'tkazdi.
Avvalo, ko'chada savdo qiluvchi ayollar soliq to'lamasliklari bois arzonroqqa savdo qilishi, qarzga mahsulot berishi bolalarning diqqatini tortmoqda.
Ayollar, o'z navbatida, muxbirlar bilan suhbatda ish topa olmaganliklari uchun bunday ish bilan shug'ullanishlarini ma'lum qildilar.
Ta'kidlanishicha, ular sotayotgan mahsulotlar sanitariya-gigiyena talablariga mutlaqo javob bermaydi. Ularga qarshi bir qancha reydlar uyushtirilganiga qaramay, hozircha ko'pgina maktablarda vaziyatni o'nglash imkoni bo'lmayapti.
