Saudiya Arabistonida haj sanoati muhimlik bo‘yicha neft sektoridan keyingi o‘rinni egallaydi, biroq qirollik neft narxi tushishi munosabati bilan, uning tuzilmasini o‘zgartirib, uni yetakchi sektorga aylantirmoqchi. Bu haqda bugun, 24-mart kuni Saudi Gazette xabar berdi, deb yozadi “RIA Novosti”.
“Iqtisodchilar hajni qirollik iqtisodiyotining katta o‘sish potensialiga ega bo‘lgan muhim sektori deb bilmoqda. Uni rivojlantirish orqali yosh erkak va ayollarning ishga joylashuvi bo‘yicha katta imkoniyatlar yuzaga keladi. Sayyohlik milliy qo‘mitasi a’zosi Abdul G‘ani al-Ansariy sektor kelajakda milliy iqtisodiyotga asosiy hissa qo‘shishi uchun, uni restrukturizatsiya qilish zaruriyatini ta’kidladi”, — deyiladi maqolada.
Sayyohlik sektori yiliga qariyb 85 milliard Saudiya riali hajmida daromad keltiradi, shundan 45 milliardi haj hissasiga to‘g‘ri keladi. Har yili Saudiya Arabistoni 2 million ziyoratchini qabul qiladi, bu 100 mingga yaqin ishchi o‘rinlari yaratilishiga imkon beradi.
Ayni paytda Makkada masjidni kengaytirish ishlari olib borilayotgani tufayli, hajdan keladigan daromadlar biroz kamaydi. Ammo qirollik hukumati rekonstruksiya yakunlangach, haj ziyorati 57 milliard rial daromad keltirishini kutmoqda, umuman, yaqin bir necha yil ichida sayyohlik sektori 35 milliard rialga oshishi ko‘zda tutilgan.
Shunga qaramay, Makka va Madinadagi ziyoratchilar soni o‘rtasidagi katta farq ham yana bir muammo hisoblanadi. Makka bir vaqtning o‘zida 12 milliondan ziyod kishini sig‘dira olsa, Madina atigi 230 ming kishini qabul qila oladi.
Manba
