AQShlik olimlar bir necha yillik tadqiqotlardan keyin kompyuter tomografiyasi inson organizmi uchun zararli ekanini isbotladilar. Olimlar, xususan, inson kompyuter tomografiyasidan o'tgan paytda oladigan nurlanish qanchalik zararligini tekshirdilar. Natijada kompyuter tomografiyasi insonning umumiy holatiga salbiy ta'sir qilishi aniqlandi, deb xabar bermoqda Ftayms nashri.
Olimlar tomografiyaning zarari inson rentgen tekshiruvidan o'tganida oladigan zarardan ancha kuchliroq ekanini ta'kidlamoqdalar.
Olimlar kompyuter tomografiyasida olingan nurlanishning DNKga ta'siri darajasini aniqlash uchun tadqiq qilinayotganlarda kompyuter tomografiyasigacha va undan keyin qon tahlili o'tkazdilar. Kompyuter tomografiyasi rentgendan farqli o'laroq, DNKni ancha kuchliroq zararlashi aniqlandi.
Shu bilan birga olimlar bugungi kunda kompyuter tomografiyasining o'rnini bosuvchi qurilma mavjud emasligini tan olmoqdalar. Tomografiya orqali olinadigan ma'lumotlar bemor holatini to'liq o'rganish uchun juda muhimdir.