Qozog‘iston hukumati texnik parametrlarga ko‘ra yengil avtomobillarni import qilishga cheklov kiritish muddatini joriy yilning 5-yanvaridan 1-iyuligacha surdi . Gazeta.uz’ning “Kazinform”ga tayanib xabar berishicha, tegishli o‘zgartishlar “Avtotransport vositalari xavfsizligiga talablar” texnik reglamentiga kiritilgan.
Yil boshida kiritilgan talablarga ko‘ra, Qozog‘iston hududida ishlatilish uchun chiqarilayotgan M1 kategoriyasidagi (haydovchini hisoblamaganda sakkiz kishigacha sig‘imli) yangi avtomobillar blokirovkaga qarshi tormoz tizimi, old xavfsizlik yostig‘i, bolalar o‘tirg‘ichi uchun ISOFIX bog‘lash moslamalari, kunduz kungi signal chiroqlari va immobilizatorga ega bo‘lishi kerak. O‘zbekistonda ishlab chiqariladigan Nexia va Matiz ushbu talablarning barchasiga ham javob bermaydi.
Fevral boshida Ostonada O‘zbekiston va Qozog‘iston delegatsiyasining O‘zbekistonda ishlab chiqarilayotgan yengil mashinalarni qo‘shni mamlakatga eksport qilishni cheklash bo‘yicha muzokaralari bo‘lib o‘tgan edi. Unda tomonlar masalani hal qilishning o‘zaro maqbul yo‘lini topib, o‘zaro savdo aloqalaridagi qulay sharoitlarni saqlab qolishga tayyorligini bildirgan.
