Toshkentdagi “O‘zekspomarkaz”da Qishloq va suv xo‘jaligi, qishloq xo‘jaligi mahsulotlarini qayta ishlash va iste’mol tovarlari masalalari hamda Axborot tizimlari va telekommunikatsiya masalalari komplekslarining tarmoq sanoat yarmarkalari boshlandi, deb xabar bermoqda O‘zA.
Tadbirlarda “O‘zpaxtasanoat” uyushmasi, Oziq-ovqat sanoati korxonalari uyushmasi, “O‘zbekyengilsanoat” davlat aksiyadorlik kompaniyasi, Qishloq va suv xo‘jaligi vazirligi, “O‘zagromashservis” uyushmasi, “O‘zdonmahsulot” aksiyadorlik kompaniyasi, Aloqa, axborotlashtirish va telekommunikatsiya texnologiyalari davlat qo‘mitasi tarkibiga kiradigan 160 korxona ishtirok etmoqda.
Tadbir ishtirokchilarida Aloqa, axborotlashtirish va telekommunikatsiya texnologiyalari davlat qo‘mitasi korxonalarining stendlari katta qiziqish uyg‘otmoqda. Ular raqamli televideniye to‘lqinlarini qabul qilish moslamalari, turli modemlar, IPTV pristavka va multipleksorlar, statsionar hamda mobil telefonlar, boshqa yuqori texnologiyali mahsulotlarni namoyish etmoqda. Ayniqsa, Olive Telecom O‘zbekiston-Hindiston qo‘shma korxonasi stendi alohida ajralib turibdi. Mazkur korxona O‘zbekistonda ishlab chiqarilgan ilk planshetni, yangi mobil telefonlarning tajriba namunasi va “android” smartfonlarini taqdim etgan.
“Suvmash” ochiq aksiyadorlik jamiyati, “Buxoro MTZ” davlat unitar korxonasi, “Birodar” sho‘ba korxonasi, “O‘rama salnik” va “Megarezinaplast” mas’uliyati cheklangan jamiyatlari kabi “Suvinshootmash” uyushmasiga a’zo o‘ttizdan ortiq korxona yuz turdan ziyod sanoat mahsulotini taqdim etdi. O‘tgan yili soha korxonalari tomonidan qiymati 17 milliard so‘mlik shartnomalar tuzilgan edi. Bu yil bu ko‘rsatkich 42 milliard so‘mga yetishi kutilmoqda.
– Korxonamiz Markaziy Osiyoda nasos, elektr mashinalari, elektr nasos agregatlari va ehtiyot qismlar ishlab chiqaradigan yagona korxonadir, – deydi “Suvmash” ochiq aksiyadorlik jamiyatining savdo xizmati direktori Kamoliddin Bakirov. – Bu mahsulotlar qishloq xo‘jaligi, suv va gaz ta’minoti uchun mo‘ljallangan. 2001-yilda Mahalliylashtirish dasturiga kiritilgan korxona bugungi kunda 47 turdagi uskuna ishlab chiqarishni o‘zlashtirdi. 2013-yilda tarmoq sanoat yarmarkasi doirasida to‘qqiz milliard so‘mlik shartnoma imzolangan edi. Bu korxonaga ishlab chiqarish hajmini oshirish va mahsulotni eksport qilish ko‘lamini kengaytirish imkonini berdi.
Ayniqsa, Oziq-ovqat sanoati korxonalari uyushmasi stendi ko‘pchilikning e’tiborini tortmoqda. Uyushma bugun yog‘-moy, go‘sht-sut, konserva mahsulotlari, spirtli ichimliklar, shakar va boshqa oziq-ovqat mahsulotlari ishlab chiqarayotgan 180 korxonani o‘z tarkibida birlashtirgan.
Xususan, “Maselko” qo‘shma korxonasi quyuqlashtirilgan sut, turli xil sariyog‘, “Toshkent sifat sut” mas’uliyati cheklangan jamiyati bir necha turdagi pishloq, tvorog mahsulotlari va yogurtni namoyish etmoqda. Joriy yilda soha korxonalari qiymati 27 milliard so‘mlik shartnoma tuzishni rejalashtirgan.
Shuningdek, “O‘zpaxtasanoat” uyushmasi 2014-yilda soha korxonalari paxta tozalash zavodlariga texnologik uskunalar, butlovchi va ehtiyot qismlar yetkazib berish uchun 22 milliard so‘mlik shartnoma tuzishni rejalashtirmoqda.
