Ma'lumki Facebook Whatsappni juda katta pul evaziga sotib olgandan so'ng foydalanuvchilarning sevimli messenjerida yangiliklar bo'lishini kutishgan edi. Birinchi yangilik o'zini ko'p kutdirmadi. Barselonada ochilgan Mobile World Congress ko‘rgazmasida mobil qurilmalar dasturlari borasida yirik xushxabarlardan biri e’lon qilindi – WhatsApp messenjerida ovozli qo‘ng‘iroqlar paydo bo‘ladi. Mazkur xizmat joriy yilning ikkinchi choragidan yo‘lga qo‘yiladi, deb yozadi Mail.ru.
Buni ushbu dastur asoschilaridan biri – Yan Kumning shaxsan o‘zi e’lon qildi. WhatsApp’ning qaysi mobil operatsion tizimga mo‘ljallangan varianti dastlab yangilanishi haqida Kum hech narsa demadi. Ammo u dastur foydalanuvchilari soni allaqachon 465 milliondan oshganini ta’kidladi.
Eslatib o‘tamiz, o‘tgan haftada Facebook kompaniyasi WhatsApp’ni sotib olishi haqida xabar berilganida, undan foydalanuvchilar 450 million nafar, deyilgan edi. Umuman olganda, Sukerberg va Kum endilikda bir milliardlik marrani ko‘zlashmoqda.
Qizig‘i, ovozli qo‘ng‘iroq joriy etilishi – WhatsApp’ning oxirgi to‘rt yil ichidagi (fotosurat yuborish imkoniyatidan keyingi) ilk jiddiy yangilanishidir. Tabiiyki, mazkur mobil messenjerda ovozli qo‘ng‘iroq xizmati yetishmayotgan edi. Boshqa shu kabi dasturlar – Mail.ru Agent, LINE, Viber va Skype’da bu xizmat allaqachon yo‘lga qo‘yilgan. Shu bois WhatsApp funksiyalari kengayishi va boshqa qiziqarli yangiliklar ham bo‘lishi kutilmoqda. Yan Kum o‘z so‘zida WhatsApp avvalgidek reklamalardan xoli bo‘lishini ham ta’kidlab o‘tdi.
Foto manba: Hi-tech.mail.ru