“YuKOS” sobiq rahbari Mixail Xodorkovskiy 2013-yilda turmadan chiqayotganida siyosat bilan shug‘ullanmaslik haqida hech qanday majburiyatni olmaganini ma’lum qildi. Bu haqda u Londondagi klubda jurnalist va talabalar bilan bo‘lib o‘tgan uchrashuvda aytib o‘tdi, deb yozadi “RBK”.
“Putin meni o‘n yilga qamatdi va uning o‘zi meni onam bilan vidolashish uchun ozod etdi, u buni qilmasligi ham mumkin edi. Shuning uchun bizning shaxsiy hisob-kitobimiz yopildi, deb hisoblayman. Biz shunchaki siyosiy raqiblarmiz”, — dedi u.
U qamoqdan siyosiy faoliyat bilan shug‘ullanmaslik sharti ostida chiqqanligi haqidagi ma’lumotni Xodorkovskiy “Kreml targ‘ibotchilari tomonidan o‘ylab topilgan uydirma” deb atadi.
Mixail Xodorkovskiy 2003-yilda hibsga olingan. 2005-yilda u firibgarlik uchun 9 yil muddatga ozodlikdan mahrum qilingan, 2010-yilda esa neftni o‘g‘irlaganlik va uni sotishdan tushgan daromadni qonuniylashtirganlikda ayblanib, 14 yilga qamalgan. Muddat u hibsga olingan vaqtdan boshlab hisoblangani va muddatning turli instansiyadagi sudlar tomonidan qisqartirilgani natijasida Xodorkovskiy 2014-yilning avgustida ozodlikka chiqishi kerak edi. Ammo tadbirkor insoniylik xarakteriga ega bo‘lgan vaziyatni: onasining xastaligini pesh qilganidan so‘ng, Putin 2013-yil dekabrida uni afv etish haqidagi farmonni imzolagan edi.
Manba
