AQShning General Motors konserni “yangi avtomobil dasturiga” 245 mln dollar miqdorida investisiya qilishini ma'lum qildi.
USA Today nashri ma'lumotlariga ko'ra, bu pullar Bolt elektromobili va hozircha nomi aytilmagan yana bitta modelning seriyali versiyalarini ishlab chiqarishga sarflanadi.
Chevrolet Bolt hamyonbop elektr karining prototipi ilk bor yanvar oyida namoyish etilgan edi. Avtomobil qayta quvvatlashsiz 322 km yo'l bosa oladi. “Bolt”ning seriyali versiyasi 2016 yilning kuzida paydo bo'ladi va sotuvga 2017 yildan chiqariladi.
Kompaniya chorak milliard dollarni Detroyt yaqinida joylashgan Orion Assembly korxonasiga investisiya qiladi. Kompaniya bu pullarga 300ta qo'shimcha ish o'rni yaratishni mo'ljallamoqda. Ma'lumotlarga ko'ra, yangi modellarni yig'ish uchun zarur bo'ladigan uskunalarni zavodda o'rnatish keyingi yilda boshlanadi.
GM kompaniyasida bu pullar umumiy qiymati 5,4 mlrd dollarni tashkil qiladigan uch yilga mo'ljallangan investision dasturning bir qismi hisoblanishi aytildi. Pullarning hammasi konsernning AQShdagi ishlab chiqarish quvvatlarini oshirish uchun sarflanadi.
