Shimoliy Koreya mart oyida AQSh va Janubiy Koreyaning hamkorlikdagi harbiy mashqlari o‘tkazilgudek bo‘lsa, mazkur ikki mamlakatga zarba berishi to‘g‘risida ogohlantirdi. Bu haqda “Gazeta.ru” xabar bermoqda.
KXDR armiyasi oliy qo‘mondonligi bayonotida hamkorlikdagi harakatlar yoki AQSh harbiylari joyini o‘zgartirishi alomatlari sezilsa, armiya “dushman kuchlariga oxirgi odam qolgunicha” qarshilik ko‘rsatishi bildirilgan. Zarba berish chog‘ida Janubiy Koreya prezidenti Pak Kin Xe qarorgohi va AQSh “asosiy nishon” bo‘lishi ma’lum qilingan.
Eslatib o‘tamiz, oldinroq AQSh va Janubiy Koreya 2016-yili eng katta ko‘lamdagi o‘zaro harbiy mashqlarni o‘tkazishi haqida xabar berilgandi.
