Maktab o'quvchilarining bir xil kiyimda ta'lim olishi ularning o'zlashtirish ko'rsatkichlariga ham ta'sir o'tkazadi. Bu haqda “Oila davrasida” gazetasida chop etilgan maqolada aytildi.
Muallif maktab formasining bir xil namunada bo'lishiga qarshi, farzandiga o'zi xohlagan kiyimni olib berishga harakat qiladigan ayrim ota-onalarning e'tirozlari masalasiga to'xtalgan. Maqolada Xalq ta'lim vazirligi hamda soha mutaxassislarining fikri aks etgan.
Aytilishicha, bir xil kiyim o'quvchilarni har jihatdan tenglashtiradi, e'tiborni to'liq ta'lim-tarbiyaga qaratadi. Bola ham o'z navbatida maktabga bilim olish uchun borishini tushunib etadi. Qolaversa, bu ta'lim muassasalaridagi ijodiy muhitni yanada yaxshilashi iddao etildi.
Muallifning fikricha, dress-kodning joriy qilinishi bolalar o'rtasida kelib chiqadigan “ijtimoiy tengsizlikning oldini olishi” barobarida, maktab ichki tartib-intizomini saqlashga xizmat qiladi.
Xilma-xil kiyim esa, muallifning aytishicha, o'quvchilar “psixologiyasiga salbiy ta'sir o'tkazishi aniq”. Chunki qimmatroq kiyinib kelgan o'quvchi sinfning “lideri” sifatida ko'rilishi mumkin.
Maqolada bu boradagi jahon tajribasi haqida hech qanday ma'lumot keltirilmadi. Jumladan, nega aksariyat rivojlangan mamlakatlarda maktablar uchun yagona uniforma joriy etilmaganligi haqida savol ochiq qoldirildi.
