Windows operatsion tizimida mavjud bo'lgan “Kosinka”, “Svobodnaya yacheyka” (“Bo'sh katak”) va “Sapyor” o'yinlari qanchalik qiziqarli bo'lmasin, ular aslida ko'ngilochish uchun yaratilmagan, deb yozmoqda Mental Floss jurnali.
“Kosinka” o'yini Windows’ning 3.0 versiyasida 1990 yilda paydo bo'lgan, deb yozmoqda nashr. “Kosinka” pasyansning bir turi bo'lib, u 18-asrning oxiridan beri ma'lum bo'lgan. Ushbu o'yinning Microsoft yaratgan raqamli versiyasi kelajakda bu o'yinni o'ynash uchun stol yoki qarta kerakmasligini ko'rsatdi, biroq uni ishlab chiquvchilar aslida boshqa maqsadni ko'zlashgan.
“O'yindan asl maqsad foydalanuvchilarga kompyuter sichqonchasini boshqarishni o'rgatish bo'lgan”, deb ta'kidlamoqda nashr.
“Sapyor” o'yini ham texnologiyalarni ishlatish madaniyatida muhim iz qoldirdi, deb yozmoqda nashr. “Minalashtirilgan” kataklarni kataklar ortida yashiringan raqamlar ustida mantiqiy operatsiyalar bajarish orqali ochishga asoslangan shunga o'xshash “Kub” boshqotirmasi 20-asrning 70-yillarida ommalashib ketdi va 20 yillardan keyin uning raqamli versiyasi – “Sapyor” o'yini Windows 3.1 operatsion tizimida paydo bo'ldi. Bu o'yin kompyuter foydalanuvchilariga sichqonchaning chap va o'ng tugmalaridan aniq va tez foydalanishni o'rgatish uchun yaratilgan.
1992 yilda Windows operatsion tizimining lokal tarmoqlar yaratish imkoniyatiga ega bo'lgan ilk versiyasi – ishchi guruhlar uchun Windows 3.1 operatsion tizimida paydo bo'lgan “Chervi” o'yinida esa NetDDE texnologiyasi yordamida boshqa foydalanuvchilar bilan bog'lanishning imkoni paydo bo'ldi. “Chervi” o'yini bu shunchaki qarta o'yini emas, balki foydalanuvchilarni yangi tizimning tarmoq imkoniyatlariga qiziqtirish va ularni hayratlantirishning usuli bo'lgan.
“Svobodnaya yacheyka” o'yini esa Windows 3.1 operatsion tizimida Microsoft Entertainment Pack Vol.2’ning bir qismi sifatida chiqqan va operatsion tizimning 16 bitli versiyasida 32 bitli dasturlarni ishga tushirish uchun foydalanilgan Win32s paketi bilan birga ketgan. Agar paket noto'g'ri o'rnatilgan bo'lsa, o'yin ishga tushmagan. Bu esa ushbu o'yin operatsion tizimning yashiringan sinovi ham bo'lganini ko'rsatadi.
Microsoft kompaniyasi bu o'yinlarini Windows paketidan olib tashlaganda, foydalanuvchilar aqldan ozayozgudek bo'lganlar, chunki ularga bu o'yinlar juda yoqar edi. Shuning uchun ishlab chiquvchilar operatsion tizimning keyingi versiyalarida bu ham standart o'yinlar o'z vazifasini bajarib bo'lganiga qaramasdan ularni uzoq vaqt davomida saqlab qolishgan. Windows’ning yaqinda chiqqan 10-versiyasida bu o'yinlardan faqatgina “Kosinka” qolgan, deb yozmoqda nashr.
