Rossiya Bosh prokuraturasi Checheniston rahbari Ramzan Qodirovning tizimdan tashqari muxolifat haqidagi bayonotlarida ekstremistik tarkib bor-yo‘qligini tekshirishni respublika prokuraturasiga topshirdi. Bu haqda “Vedomosti” xabar bermoqda.
Tekshiruv Peterburg qonunchilik yig‘ini deputati Maksim Reznikning so‘roviga binoan amalga oshiriladi. Deputatning rasmiy vakili “Fontanka.ru” sayti bilan suhbatida murojaat Checheniston prokuraturasiga yo‘llangani haqida rasmiy xat kelganini ma’lum qildi.
12-yanvar kuni Ramzan Qodirov chechenistonlik jurnalistlar bilan uchrashuv chog‘ida tizimdan tashqari muxolifat vakillarini murakkab iqtisodiy vaziyatdan foydalanib qolishga urinayotgan “xalq dushmanlari va xoinlar”, deb atagandi. Checheniston rahbarining ushbu so‘zlari qizg‘in muhokamalarga sabab bo‘ldi. Reznik siyosatchining bu bayonotida ekstremizm unsurlari bor deb hisoblab, bosh prokuraturaga murojaat qildi.
