Instagram orqali mamlakat rahbari Ramzan Qodirovga maktub yozgan chechenistonlik bola o'z qishlog'ining 50 kun ichida yangidan qurilishiga erishdi. Bu haqda RIA Novosti xabar bergan.
Xabarda aytilishicha, bu bola Groznensk tumanining Dolinsk qishlog'ida yashaydi va u bu qishloqda odamlar qanday sharoitlarda yashayotgani haqida Ramzan Qodirovni ogoh etgan.
"Hukumat bu qishloqqa maxsus guruhni jo'natdi va 50 kun ichida qishloqni qaytadan qurdi", deb yoziladi Checheniston prezidentining matbuot xizmatida.
Ma'lum qilinishicha, qishloqda 47ta ko'p qavatli uy ta'mirdan chiqarilgan, yangi yo'llar va masjid qurilgan, qishloq maktabi yangilangan, bog'lar, shifoxona, sport inshootlari barpo etilgan hamda ko'chalarga chiroqlar o'rnatilgan.