Shveysariya ikki mamlakat o‘rtasida diplomatik aloqalar uzilgani sababli Saudiya Arabistoni manfaatlarini Eronda va Eron manfaatlarini Saudiyada ifoda etadi. Mamlakat tashqi ishlar vaziri Didye Burkxalterning Ar-Riyodga tashrifi chog‘ida bu borada kelishuvga erishildi, deya xabar beradi “TASS”.
Vazir tashrif davomida mamlakat rahbari Salmon ibn Abdulaziz va tashqi ishlar vaziri Odil al-Jubayr bilan uchrashdi va ularni Saudiya Arabistonida Tehron manfaatlarini himoya qilish yuzasidan Eronning iltimosi haqida xabardor qildi. Shuningdek, Shveysariyaning ikki mamlakat bilan ham yaxshi munosabatlari va mintaqada barqarorlikni ta’minlashga intilishini inobatga olib, Saudiya Arabistoniga Ar-Riyod manfaatlarini Tehronda ifoda etishni taklif qildi.
Muzokaralar yakunlanganidan so‘ng bo‘lib o‘tgan matbuot anjumanida Odil al-Jubayr ikki davlat o‘rtasida vositachilikni zimmasiga olayotgani uchun Shveysariya rasmiylariga minnatdorchilik bildirdi va Saudiya ushbu taklifni qabul qilishini bildirdi.
Manba
