O‘tgan hafta ichida Samsung Galaxy S6 smartfonining O‘zbekistondagi chakana narxi 600 ming so‘mga tushib ketdi, deya xabar bermoqda “Mobinfo.uz”.
Smartfon Toshkentda mart oxirida 3,2 million so‘mdan (32 Gb xotirali versiyasi) sotuvga chiqqan bo‘lsa, 5-aprel kuniga kelib, uni 2,6 million so‘mga xarid qilish mumkin bo‘ldi.
Poytaxtdagi “Fleshka” savdo markazi sotuvchilari so‘zlariga ko‘ra, Galaxy S6’ning arzonlashuvi bozordagi takliflar sonining oshishi bilan bog‘liq. Yaqin vaqtlar ichida qurilma narxi yana bir necha yuz ming so‘mga pasayishi mumkin va shundan so‘ng ma’lum bir qiymatda barqaror sotila boshlaydi.
Samsung kompaniyasining yangi flagman smartfoni — Galaxy S6 mart oyi boshida Barselonadagi MWC 2015 ko‘rgazmasi doirasida taqdim etilgan edi.
Smartfon 8 yadroli Exynos 7429 protsessori, 5,1 dyuymli va 2560×1440 pikselli Super AMOLED-displey, 16 megapikselli asosiy va 5 megapikselli old kamera, 3 Gb tezkor va 32/64/128 Gb ichki xotira, 2550 mA/s sig‘imli akkumulyatorga ega.
Qurilma Android 5.0 operatsion tizimida ishlaydi.
