Amerikaning Texas-Siti shahridagi suv quvurlari kompaniyasi xo‘jayini Mark Oberxolser o‘zining Ford yo‘ltanlamas avtomobilini avtodilerga sotdi. Bu hodisa uning hayotini o‘zgartirib yubordi, deb yozadi Meduza.
Oldi-sotdidan bir yil o‘tib, Twitter’da xuddi o‘sha avtomobil surati paydo bo‘ldi, mashinaga Mark-1 Plumbing kompaniyasi nomi va uning telefon raqami yozib qo‘yilgan edi. Qizig‘i shundaki, surat Suriyada tushirilgan bo‘lib, yo‘ltanlamasning ochiq kuzovida zenitli qurol turardi. Endi Oberxolser diler bilan sudlashmoqda: surat chop etilgach, unga haqorat va tahdidlardan iborat minglab telefon qo‘ng‘iroqlari bo‘ldi.
Oberxolserga diler mashinadagi yozuvlar o‘chirilishini va’da qilgan edi. Biroq Ford auksionda sotildi va Turkiyaga yo‘l oldi. Keyinroq u “Jaysh-al-Muhojirin val-Ansar” (“Payg‘ambar safdoshlari armiyasi”) ekstremistik guruhining chechenistonlik a’zolari tomonidan Bashar Asad rejimiga qarshi kurashda qo‘llanildi.
Oberxolserni FQB agentlari va AQSh ichki xavfsizlik vazirligi xodimlari so‘roq qildi. Unga o‘z-o‘zini himoya qilish haqida o‘ylab ko‘rishni tavsiya etishdi va u o‘zi bilan to‘pponcha olib yuradigan bo‘ldi.
Avtodiler bilan oldi-sotdidan ikki yil o‘tib, Oberxolser moliyaviy zarar va kompaniyasi obro‘siga yetgan putur uchun 1 million dollar tovon puli talab qilib sudga da’vo berdi.
