“American Airlines” aviakompaniyasiga qarashli Las-Vegasdan Filadelfiya tomon parvozni amalga oshirayotgan samolyot yo`lovchilari havo kemasi komandirining kutilmagan xabaridan hayratga tushdilar. Yo`lovchilardan biri esa yaqinda ota bo`lishini eshitib, shok holatiga tushdi. Uning rafiqasi aynan shu noodatiy usul bilan ota bo`lishidan xabardor qilishga qaror qilgan. Bu haqda “Lifenews.ru” nashri xabariga asoslanib "Darakchi" ma'lumot bermoqda.
Erik va Liza Sedivnik Las-Vegasdan Filadelfiya tomon samolyotda parvoz qilishayotganda uchuvchi xabarni e`lon qilayotganini videotasvirga olishgan:
“Menga bir maktubni etkazishdi, hozir uni sizlarga so`zma-so`z o`qib beraman, diqqat qiling. Las-Vegasda katta yutuqni qo`lga kiritgan g`oliblarga guruhimizning ham o`z sovg`asi bor. 29 E o`rindiqda o`tirgan yo`lovchiga e`tibor berishingizni so`rayman, u erda rafiqasi Liza bilan sayohatga chiqqan Erik o`tiribdi. Erik, siz Las-Vegasda juda katta yutuqqa erishmagan bo`lsangiz-da, hayotda sizga omad kulib boqdi. Tabriklaymiz, siz yaqinda ota bo`lasiz!”, — deya xabar qilgan samolyot uchuvchisi.
Samolyot borti yo`lovchilarning olqish va qarsaklariga to`lgan. Liza Sedivik bu videotasvirni o`tgan hafta Facebook ijtimoiy tarmog`idagi sahifasiga joylashtirgan. Uni 60 mingdan ortiq foydalanuvchi tomosha qilgan.
