Ko‘p yillar avval Mayk Xyuz ismli o‘t o‘chiruvchi 9 oylik Daniel Devisonni yong‘indan omon olib chiqqandi, deya xabar bermoqda Adme.ru.
“Yetib kelganimizda uyning katta qismi alanga ichida qolgandi. Danielni yotoqxonadan, o‘z o‘rniga g‘ujanak bo‘lib yotib olgan holda topgandim”, – deydi Xyuz.
Oradan bir necha yil o‘t o‘chiruvchi o‘zi qutqargan chaqaloqning taqdiri bilan qiziqdi. U Facebook’dan uning akkauntini topib, unga: “Adashmasam, sen juda kichkina bo‘lganingda, men seni yong‘indan olib chiqqanman”, – deb yozdi. Shundan so‘ng ular yozishmalarni davom ettirishdi va Mayk qiz uchun ikkinchi otasidek bo‘lib qoldi.
O‘sha yong‘indan 17 yil o‘tib Daniel Maykni o‘zining qutqaruvchisi va yaqin do‘sti sifatida bitiruv oqshomiga taklif qildi.
Sobiq o‘t o‘chiruvchi Danielning so‘zlarini eshitib, ko‘ziga yosh oldi. Daniel shunday dedi: “Maykning bugungi tadbirda ishtirok etayotgani men uchun juda muhim. Hammasi butunlay boshqacha bo‘lishi mumkin bo‘lganini o‘ylasam, har doim baxtiyorligimdan yig‘layman. Agar sen bo‘lmasang, men bu yerda bo‘lmasdim”.
