Andijon viloyatining Jalaquduq tumanida “Biz – buyuk yurt farzandlarimiz!” shiori ostida yoshlar festivali bo‘lib o‘tdi. Tuman hokimligi, prokuraturasi, “Kamolot” yoshlar ijtimoiy harakati tuman kengashi va boshqa tashkilotlar hamkorligida tashkil etilgan tadbirda 2000 nafardan ziyod yosh ishtirok etdi. Bu haqda O‘zA xabar berdi.
Tadbir doirasida umumta’lim maktablari va kasb-hunar kollejlari o‘quvchilari tomonidan tayyorlangan qo‘l mehnati buyumlari, rasmlar ko‘rgazmasi, shuningdek, respublika va xalqaro san’at tanlovlari g‘oliblarining chiqishlari namoyish etildi.
– Biz, yoshlarning iste’dod va salohiyatimizni yuzaga chiqarish uchun keng imkoniyatlar yaratib berilmoqda, – deydi tumandagi 1-umumta’lim maktabi o‘quvchisi Maftunabonu Mahmudjonova. – O‘tgan yili mening Italiyada o‘tkazilgan xalqaro san’at festivalida g‘oliblar qatoridan joy olganim ham ana shu yuksak e’tiborning samarasidir.
San’atkorlar ijrosidagi kuy-qo‘shiqlar va yoshlarning o‘zi tayyorlagan sahna ko‘rinishlari tadbirga ko‘tarinki kayfiyat bag‘ishladi.
