Gollivud shon-sharaf xiyobonida italiyalik bastakor Ennio Morrikone nomi tushirilgan yulduz paydo bo‘ldi. “TASS”ning yozishicha, shu yo‘l bilan uning kino san’atiga qo‘shgan hissasi e’tirof etildi – 1960-yildan buyon mashhur musiqachi 450 dan ortiq filmga musiqa bastalab bergan.
Kventin Tarantinoning “Jirkanch sakkizlik” nomli oxirgi filmiga bastalagan musiqasi uchun Morrikone “Oskar” mukofotiga nomzod qilib ko'rsatildi.
Morrikone shaxsiy yulduzining ochilish marosimi 26-fevral, juma kuni Los-Anjelesda bo‘lib o‘tdi.
“Bunday sharaf mening ulushimga tushadi deb hech qachon kafolat bera olmagan bo‘lardim. Men yulduzga ega bo‘laman deb kutmagandim”, – deb tan oldi italiyalik maestro.
Uni qutlash uchun tantanali marosimga Kventin Tarantino hamda The Weinstein Company kinostudiyasi asoschilaridan biri Xarvi Vaynshteyn tashrif buyurdi.
Gollivud shon-sharaf xiyoboni Los-Anjelesning shimoli-sharqida joylashgan. Undagi birinchi yulduz 1958-yilning 15-avgustida aktyor Preston Foster sharafiga o‘rnatilgan. Ammo xiyobon rasman 1960-yilning 23-noyabrida ochilgan. Hozirda u yerda 2574 kino sohasi vakili sharafiga yulduzlar o‘rnatilgan.
Manba
