2013 TX68 asteroidi 5-mart kuni Yerga nisbatan yaqinlikda uchib o‘tadi, deb yozadi “TASS”.
NASA mutaxassislari fikricha, to‘qnashish xavfi yo‘q, ammo asteroid sayyoraga qanchalik yaqin masofada uchib o‘tishi borasidagi hisob-kitoblar bir-biridan farq qilmoqda. Prognozlardan biriga ko‘ra, asteroid 14 million km — Yer va Oy o‘rtasidagi masofadan 35 marta kattaroq masofada uchib o‘tadi. Yana boshqa taxminlarga ko‘ra, u 17 ming km naridan o‘tadi, bu geostatsionar yo‘ldoshlar orbitasiga to‘g‘ri keladi.
Bir-biridan farqli baholar berilishiga sabab olimlar asteroid haqida yetarlicha ma’lumotga ega emasligidadir. U 2013-yilda aniqlangan bo‘lib, o‘shanda olimlar uni uch kun davomida kuzatishga ulgurgan.
Dastlabki hisob-kitoblarga ko‘ra, asteroid diametri taxminan 30 metrga teng. National Geographic ta’kidlashicha, ushbu osmon jismi Chelyabinskka 2013-yil 15-fevralda qulagan asteroiddan kattaroqdir.
Manba
