Siz quyida ko’rib turgan suratlarni illuziya yoki fotoshop deb o’ylasangiz, qattiq yanglishasiz. Ular dunyodagi eng katta tabiiy ko’zgu hisoblangan Salar de Uyunining yomg’ir yoqqandan keyingi manzaralari.
Bu joy dunyodagi eng katta tuz yotqizig’i bo’lib, maydoni 10582 km. kv. U Boliviyaning janubi-g’arbida joylashgan.
Tuz va litiyning boy manbai hisoblangan Salar de Uyuni Boliviya tog’liklari aro transport yo’li vazifasini ham bajaradi. Bundan tashqari, pushtirang flamingolarning ko’payish makoni ham hisoblanadi. Lekin tuz yotqiziqlarini dunyoga mashhur qilgan narsa yomg’irdan keyingi oynasimon manzaradir.
Yotqiziq o’rnida bundan 10 ming yillar avval yirik ko’l bo’lgan. Keyinchalik rel’yef va iqlim o’zgarishlari tufayli ko’l batamom qurib bitgan va o’rnida siz ko’rib turgan tuz shahrosi paydo bo’lgan. Tuz yotqiziqlari sathi juda tekis: butun maydonning past-balandlik farqi 1 metrdan kam.
Yomg’ir yoqqanda Salar de Uyuni suv bilan qoplanadi va ta’riflab bo’lmas darajada go’zal manzara hosil qiladi. Bu payt yer qayerda tugab, osmon qayerda boshlanishini ajrata olmaysiz.
