Checheniston rahbari Ramzan Qodirov Ukraina bosh vaziri Arseniy Yatsenyuk 1990-yillarda chechen jangarilari tomonida turib jang qilganiga ishonishdan bosh tortdi, deya xabar bermoqda Meduza.
“U haqiqiy botanik. Agar u jangchi bo‘lsa va qayerdadir jang qilgan bo‘lsa, demak mening hech narsaga aqlim yetmaydi”, — dedi Qodirov.
“U urush chog‘ida Chechenistonda bo‘lgani haqida menda hech qanday ma’lumot yo‘q. U haqiqiy qo‘rqoq va sotqin, u hech kim bilan jang qilishga qodir emas”, — dedi respublika rahbari.
Nashr eslatishicha, 8-sentabr kuni Rossiya Tergov qo‘mitasi raisi Aleksandr Bastrikin Yatsenyuk 1994—1995-yillarda Grozniydagi janglarda jangarilar tomonida turib kurashganini ma’lum qilgan, biroq bu borada hech qanday dalil taqdim etmagan edi.
Ramzan Qodirov birinchi Checheniston urushida Rossiya qo‘shinlariga qarshi ayirmachilar tomonida jang qilgan edi.
