Turkiya Konstitutsiyaviy sudining jurnalistlar Jan Dundar va Erdem Gulni ozod qilish haqidagi qarori mamlakat konstitutsiyasiga zid keladi. Bu haqda Turkiya prezidenti Rajab Toyib Erdo‘g‘on aytib o‘tdi, deya xabar bermoqda “TASS”.
“Ha, bu ishda konstitutsiyaning buzilishi kuzatiladi. Lekin uni men emas, Konstitutsiyaviy sudda bunday qarorlar qabul qilish darajasida bo‘lganlar buzdi. Ular bu qonunbuzarlikni sodir etdi”, — dedi u Nigeriya poytaxti Abudjadagi chiqishida.
Cumhuriyet gazetasi bosh muharriri Jan Dundar va nashrning Anqaradagi byurosi boshlig‘i Erdem Gul 26-fevral kuni Konstitutsiyaviy sud qaroriga ko‘ra ozod qilingan edi.
Turkiya hukumatining Suriyadagi ekstremistik kuchlar bilan aloqalari haqida yozgan bu jurnalistlarning o‘tgan yil noyabrida hibsga olinishi jahon hamjamiyatini diqqatini tortgan edi.
Manba
