12-aprel kuni soat 16:00 da Toshkentdagi “Turkiston” saroyining yozgi maydonida Samsung Galaxy S5 smartfonining taqdimot marosimi bo‘lib o‘tadi. Bu haqda Samsung kompaniyasining O‘zbekistondagi vakolatxonasining Twitter’dagi sahifasida ma’lum qilingan.
E’londa ma’lum qilinishicha, taqdimot marosimiga maxsus mehmon — rossiyalik xonanda Vera Brejneva taklif etilgan.
Samsung kompaniyasining ijtimoiy tarmoqlardagi sahifalarida aksiya e’lon qilingan bo‘lib, unda yutgan ishtirokchi marosim uchun chiptani qo‘lga kiritadi.
Eslatib o‘tamiz, 2014-yil 24-fevral kuni Mobile World Congress ko‘rgazmasida Samsung kompaniyasi Galaxy S5 smartfonining taqdimotini o‘tkazgan edi.
Samsung Galaxy S4 smartfonining O‘zbekistondagi namoyishi esa 2013-yil 11-may kuni Toshkentning “Turkiston” saroyida bo‘lib o‘tgan edi.
Foto Manba: Twitter / Samsung Uzbekistan
