Amerikaning General Motors avtokonserni shanba kuni AQSh bozoridan 51,6 mingta mashinani qaytarib olishini e’lon qildi. Bunga haydovchi va yo‘lovchi xavfsizligiga ta’sir ko‘rsatishi mumkin bo‘lgan dasturiy ta’minotdagi kamchilik sabab bo‘lgan. Bu haqda “ITAR-TASS” xabar berdi.
Ushbu mashinalar 2013-yil mart—avgust oylarida ishlab chiqarilgan Buick Enclave, GMC Acadia va Chevrolet Traverse yo‘ltanlamaslaridir. Ma’lum bo‘lishicha, ularning dasturiy ta’minotidagi nosozlik tufayli, bakdagi yoqilg‘i darajasini ko‘rsatuvchi uskuna noto‘g‘ri ishlashi, natijada kutilmagan paytda benzin tugab qolishi mumkin.
General Motors bayonotida ta’kidlanishicha, gap faqat ehtiyot choralari haqida ketmoqda, ushbu nosozlik natijasida sodir bo‘lgan yo‘l-transport hodisalari qayd etilmagan.
