Norvegiya qamoqxonasida 21 yillik qamoq jazosini o‘tayotgan Anders Breyvik o‘z yashash sharoitlari "qiynoqqa o‘xshash”ligidan shikoyat qildi. Uni 2011-yildan buyon boshqa mahbuslardan ajratgan holda saqlashmoqda. Breyvik bunday qiyin sharoitda saqlanayotganligini inobatga olib, o‘zining "mashg‘ulot turlari”ga xilma-xillik kiritishlarini talab qilmoqda, deb yozadi Tjournal sayti.
Breyvik o‘zining PlayStation 2 o‘yin konsolini nisbatan yangi versiyasi – "kattalarga mo‘ljallangan o‘yinlari bo‘lgan” PlayStation 3 ga almashtirib berishlarini talab qildi. 29-yanvardagi xatida ma’lum qilishicha, agar sharoitlarni yaxshilashmasa, vaziyatga ta’sir etish uchun ochlik e’lon qilishiga to‘g‘ri kelarmish.
Bundan tashqari, mahbus tashqi dunyodagi kishilar bilan erkinroq muloqot qilishni, kunduzgi sayrlar uchun yaxshiroq sharoitlarni hamda kundalik tekshiruvlar bekor qilinishini xohlamoqda. Breyvik chiqimlari ko‘payganligi munosabati bilan, o‘ziga to‘lanayotgan nafaqa pulini 300 kron (taxminan 49 AQSh dollari)ga ko‘tarishlarini so‘ragan. Shuningdek, u "1873-yilgi texnologiyalarga asoslangan befoyda yozuv mashinkasi” o‘rniga shaxsiy kompyuter berishlarini talab qilgan.
PlayStation 2 konsoli Sony kompaniyasi tomonidan 2000-yilda chiqarilgan. 2006-yilda chiqqan PlayStation 3 versiyasining ko‘pchilik modifikatsiyalariga avvalgi modelning disklari to‘g‘ri kelmaydi. 2013-yilning fevralida keyingi avlod konsoli – PlayStation 4 versiyasi e’lon qilingan.
Anders Breyvik 2011-yili Osloning markaziy tumanlaridan birida bomba portlatgan, keyin esa Utoyya orolidagi lagerda yoshlarni o‘qqa tutgan. Umumiy hisobda u 77 kishining umriga zomin bo‘lgan.
