2014-yildan boshlab IShID terrorchi guruhi bolalardan askar sifatida uch barobar ko‘proq foydalana boshladi. Jangarilarning tashviqiy materiallaridan foydalanib o‘tkazilgan tadqiqot natijasiga ko‘ra Jorjiya universiteti olimlari shunday xulosaga keldi, deb yozadi Meduza sayti.
IShID tarqatgan ma’lumotga ko‘ra, 8–18 yoshdagi 89 bola jangarilar tarafida turib urushga kirgan va to‘qnashuvlarda halok bo‘lgan. Ularning 39 foizi minalashtirilgan avtomobildagi xudkush bo‘lgan, yana 33 foizi harbiy operatsiyalarda o‘ldirilgan.
Tadqiqotchilar bu bolalarning ayrimlari haqida axborot to‘plashga muvaffaq bo‘ldi. Halok bo‘lganlarning 60 foizi 12–16 yosh orasidagi o‘smirlar ekanligini, 6 foizi esa 12 ga to‘lmasdan turib o‘ldirilgani aniqlandi.
Bolalarning yarmidan ko‘prog‘i suriyalik, qolganlari esa Yaman, Saudiya Arabistoni, Tunis, Liviya, Nigeriya, Buyuk Britaniya, Fransiya va Avstraliyadan kelgan.
