Moskva politsiyasi siyosatchi Mixail Kasyanovga uyushtirilgan hujum holati bo‘yicha ma’muriy ishni tekshirmoqda, deb yozadi “TASS”.
“Ha, gap ma’muriy ish haqida bormoqda”, — dedi siyosatchining advokati boshqa tafsilotlarni ma’lum qilmagan holda.
Nashrning huquqni muhofaza qilish organlaridagi manbasi ma’muriy ish Rossiya Ma’muriy javobgarlik to‘g‘risidagi kodeksining “Mayda bezorilik” moddasi bo‘yicha olib borilayotganiga aniqlik kiritdi. Ushbu modda bo‘yicha 500 rubldan ming rublgacha bo‘lgan ma’muriy jarima solinadi yoki 15 sutkagacha ma’muriy hibsga olinadi.
Manbaga ko‘ra, tekshiruvdan so‘ng politsiya jinoiy ish qo‘zg‘atish uchun asoslar topa olmagan.
Eslatib o‘tamiz, 9-fevral, seshanba kuni Moskva markazidagi restoranda kavkazliklarga o‘xshash qiyofadagi noma’lum shaxslar Kasyanovga tort uloqtirgan. So‘ng ularni ko‘chada kutib turgan kishilar bilan birga mashinaga o‘tirib, jo‘nab ketgan.
