Ethiopian Airlines aviakompaniyasiga qarashli samolyotni olib qochgan shaxs kemaning ikkinchi (yordamchi) uchuvchisi ekanligi ma’lum bo‘ldi. Bu xususda samolyot qo‘ndirilgan Jeneva aeroporti vakilining so‘zlariga tayangan holda Agence France-Presse xabar bermoqda.
Shveysariya politsiyasidan ma’lum qilishlaricha, asosiy uchuvchi hojatga chiqqanida uning sherigi boshqaruvni o‘z qo‘liga olib, samolyotni olib qochgan. U laynerni Jenevaga qo‘ndirib, keyin derazadan arqon yordamida tushgan. Shuningdek, yo‘lovchilar va ekipaj a’zolari hayotiga hech qanday tahdid solmagan, zero, samolyotni olib qochgan shaxs qurollanmagan bo‘lgan.
Mazkur samolyot ET-702 reysi bo‘yicha Efiopiya poytaxti Addis-Abebadan Rimga qarab parvoz qilayotgan edi. Uning bortida 200 ga yaqin kishi bo‘lgan. Sudan hududi ustidan uchib o‘tayotganida, samolyotdan uning qo‘lga olinganligi haqida xabar kelgan. Layner Jenevaga mahalliy vaqt bilan ertalabki soat oltida qo‘ngan. Uni chekkaroqdagi yo‘lakka qo‘ndirib, barcha yo‘lovchilarni qo‘llarini boshi orqasiga qilgan holda tushirib, avtobuslarga o‘tqizishgan.
Avvalroq samolyotni olib qochgan shaxs Shveysariyadan siyosiy boshpana so‘ramoqchi ekanligi xabar qilingan edi. Shveysariya hukumati matbuot anjumanida bu farazni tasdiqladi. Efiopiyalik uchuvchining so‘zlariga ko‘ra, u o‘z vatanida qolishga qo‘rqqani uchun bu ishga qo‘l urgan.
